სიმონ ბალახაძე

Simon Balakhadze

სიმონ ბალახაძე
იგივე: სიმონ ხალხოსანი
ქართველი პოეტი

წიგნები
* თათია ელერდაშვილის სასწაულებრივი ფენომენი / სიმონ ბალახაძე. - თბ. : ფირმა "მთაწმინდა", 1999. - 48 გვ.
* სა-ქარ-თვე-ლო : [ლექსები] / სიმონ ბალახაძე ; რედ. : ლეილა მესხი.- თბილისი : მერანი, 1990
* ისე ბნელა, ყველაფერი ნათელია! / სიმონ ბალახაძე ; [რედ. ლირა კარანაძე ; მხატვ. გიორგი ბალახაძე]. - თბ. : [მთაწმინდა], 2003. - 56გვ.

ბმულები:
* http://www.biblioteka.litklubi.ge/index-nawarmoebi.php?author=ბალახაძე%20სიმონ


სიმონ ხალხოსანი

ბმული:
* https://youtu.be/kPMPPaZvHqg

სიმონ ბალახაძე

სიმფონია

რამ აიყვანა
კლდეზე მოცხარი?
ჰყვავის მაყვალი
ეკლებში ძეძვის...
ბუ _ უდაბური
ხევის მოძღვარი,
ზის მუხაზე და
სინათლეს ებრძვის.

სიმონ ბალახაძე

მეოცნებე ყვავი

გაზაფხულია, ტყემალი ჰყვავის,
უმისამართოდ გიგზავნი წერილს...
თბილისის ცაში დაფრინავს ყვავი
და უკაცრიელ ტყეებზე მღერის...

სიმონ ბალახაძე

მარგალიტის მძებნელი

დავივიწყე ხედები
დედამიწის მზებნელის,
ზღვისკენ მივეხეტები
მარგალიტის მძებნელი.
გაიღვიძე, ლაზარე,
მზის ალერსით ვივსები,
მიყვარს უზარმაზარი
ლურჯი ოაზისები.
სიყმაწვილის ზღაპრები
ხმიადივით მომშივდა,
უფლისწულის საცოლის
გადავარდნა კოშკიდან.
დავივიწყე ხედები,
დედამიწის მზებნელის,
ზღვისკენ მივეხეტები
მარგალიტის მძებნელი.

სიმონ ბალახაძე

***

ხის ტოტზე ჩხართვი ზის,
მე ღრუბლებს ვუმზერ რუხს...
გენიალურად წვიმს,
გენიალურად ქუხს.

სიმონ ხალხოსანი

***

წარსულს გაჰყვა კართაგენის ომი,
ვიკინგები, ჯვაროსნები, ტროა,
პარიზია დღეს მესამე რომი,
ლუვრის ახლოს ახლა სულ სხვა დროა.
მამულისთვის ორლეანელ ქალწულს,
ახლაც უწევს სისხლისმღვრელი ბრძოლა,
აღარ უკვირს ორთავიან არწივს,
სხვის საწოლში სხვისი ცოლის წოლა.
ვაშა! ვაშა! ბორკილებთან ჭიდილს,
ვივა! ვივა! ცად აფრენილ მტრედებს,
კვლავ ენგურზე ავაშენოთ ხიდი,
მირონი სდის სვეტიცხოვლის კედელს.
სისხლით მოვრწყეთ უკვე ბრძოლის ველი,
დახარჯულა უკვე ყველა ტყვია,
უცხო ცისქვეშ მამულისთვის ვკვდები,
ამ სიკვდილსაც სიყვარული ჰქვია.
ჩემი ლექსი - რენესანსის გმირებს,
როდენს, ქვაში გაცოცხლებულ ადამს,
ვაშა! ვაშა! სანჩო პანსას ვირებს,
ვივა! ვივა! ჟოზეფინას კატას.
კვლავ ვკითხულობ ასერგასის ღამეს,
მინდა ზევსი დაუბრუნდეს თებეს,
მოვა დრო და გადავლახავ საზღვრებს,
ან საზღვრები აღარ იარსებებს.
მოვა დრო და ჩაგიხუტებ გულში,
და თვალებზე ცრემლებს დაგიკოცნი,
კოჯრის გზაზე აყვავდება ნუში,
და შენ იტყვი კვლავ ღვთისმშობლის ლოცვას.
ეჰა, საით მიაქანებს კალმახს,
აქ წითელი ოკეანის ტალღა?
ზის თათრების მოედანის პარმაღს
და მეარღნე არნო უკრავს არღანს.
სადაც წავალ, თან დამყვება მუდამ,
საქართველოვ ჩემო, შენი სახე,
ვნახე შივა, ვნახე ბუდაც, მაგრამ
თბილისს გარდა ქრისტე ვერსად ვნახე.


პარიზი, 2018 წ. 29 აგვისტო

სიმონ ხალხოსანი

***

ახლა უშენობას ხარობს
შენი საყვარელი ქალი,
მაგრამ ნუ წაბილწავ წყაროს,
ისევ მოგწყურდება წყალი.

ახლა მზე ანათებს დილის,
ბრწყინავს მაცხოვარის ძელი,
იქნებ უშენობას ტირის,
შენი სიყვარული ძველი?

პარიზი. 2014 წ. 16 ნოემბერი.

სიმონ ხალხოსანი

მურთაზ არაბულს

გუშინ პარიზში შემატყობინეს
ძამიკო, წუხელ როგორ კვდებოდი,
გადავურეკე გლდანში დობილებს,
ბიჭები ხომ არ მეხუმრებოდნენ.

მაგრამ არავინ დამიდასტურა,
შენი უმწეო გარდაცვალება,
დე, გაიარონ კვლავ რუსთაველზე
და შეგიყვარონ ქერა ქალებმა.

თუ მართლა მოკვდი, მეც მოვკვდი, ბიჭო,
დამთავრდა ჩვენი ახალგაზრდობა
და გაფიქრება იმისიც მიჭირს,
საქართველოზე ხომ არ დარდობდი.

რამ წაგიყვანა, ძმაო, ნახირში,
სად პოეტი და სად მენახირე,
ცხოვრებას ასე რად აუხირდი,
თოვაში მთაში აღარ წახვიდე.

ვიცი, დაგაკლდა ძმაკაცის ხელი
და ყურადღება ვერ მოგაქციე,
მაგრამ, ეხ, მურთაზ, ემაგ ახვრებმა,
მე ხომ პარიზში გამომაქციეს.

და უთბილისოდ დავრჩით ორივე,
ეს ტრაგედია თუ მართლა მოხდა,
მომკლავს სამშობლოს მელანქოლია
მიტოვებული ურთხმელის ქოხთან.

შენ სულ გტკიოდა ნახმლევი მხარი,
როგორც ხევსურს და არაგველს სამასს,
თუ იყო კუბო და მძლავრი ქარი,
რას ვიფიქრებდი, ძამიკო, ამას.

და თუკი მართლა ასე დამთავრდი,
როგორც პოეტი და მეგობარი,
უთხარი ბიჭებს, რომ შენს საფლავთან
დალიონ ჩემი შესანდობარიც.


პარიზი.2013 წ. 5 მარტი.

პოეზია სიმონ ხალხოსანი

ბმული:
* https://youtu.be/3pGUqExjAUU

SIMON XALXOSANI

ბმული:
* https://youtu.be/vKgbH_UJTRI

სიმონ ბალახაძე

თოვლში იდგნენ ოდები

იმ ცისფერი მდინარის
ახლაც მახსოვს დინება...
უკვე შუაღამეა,
შენ კი არ გეძინება...
ახლაც მახსოვს ფერადი
ანჩისხატის კარედი,
გახსოვს როგორ ვღელავდი,
როცა იგვიანებდი?
ახალგაზრდა როდი ხარ,
დეკემბერი მოვიდა...
რა დაღლილი მოდიხარ
ძველი სიმარტოვიდან.
თოვლში იდგნენ ოდები
და ათოვდა ხვიარებს...
აღარც მე გელოდები,
აღარც შენ იგვიანებ.

სიმონ ბალახაძე - შტრაუსის ვალსი
• Oct 23, 2021

შტრაუსის ვალსი
სიმონ ბალახაძე
ვიდეო - მიხო მოსულიშვილის, 2021

***

სიმონ ბალახაძე

შტრაუსის ვალსი

ჩემო მერცხლებო, დიდი ხანია,
თქვენ უცხოეთში გაფრინდით გუნდად,
მე დამიტოვეთ ნიკალას ფუნჯი,
ხარფუხის ცა და მათხოვრის ხურდა.

გაჰყვება ჩემი ლექსის ნაღმივით
გადაგვარებულ ამ საუკუნეს...
ჩემს სამშობლოში ვცხოვრობ ძაღლივით
და უშედეგოდ ვებრძვი უკუნეთს.

ეს ყვავილები მე უნდა ვიხსნა,
თორემ სინდისის ქნეჯნა დამახრჩობს.
კრწანისში უნდა დავიქცე სისხლად,
რომ არ დაკარგოს ფერი ყაყაჩომ.

***
Waltz by Johann Strauss
The verse by Simon Balakhadze (in Georgian)
This clip is made with: Johann Strauss - Vienna Waltz.
This clip made by Mikho Mosulishvili, Tbilisi, Georgia, 2021

ბმული:
* https://youtu.be/Q_4SVqyDGmE